Siguria e femijes brenda shtepise

0 0

Të gjithë fëmijët mund të bëhen lehtësisht viktima të aksidenteve, sepse dëshira e tyre e vazhdueshme për të zbuluar dhe studjuar mjedisin që i rrethon është e madhe. Shumë rreziqe mund të parandalohen dhe është detyra juaj të gjeni mënyrën sesi fëmija të mos dëmtohet. Megjithatë kjo gjë nuk do të thotë që t’ia kufizoni aktivitetet fëmijës tuaj, por thjesht të siguroheni që ai të mund të luajë dhe të mund të kryejë eksplorimet në botën e përreth, pa rreziqe.
Kuzhina
Kuzhina është plot me mundësi rreziqesh për fëmijën, të cilat shtohen nëse ju jeni shumë të zënë me punët e shtëpisë:
– Shumica e aksidenteve me fëmijët (rreth 2/3) ndodhin midis tenxhereve dhe sobave. Prandaj përpiquni që t’i mbani sa më larg fëmijët tuaj nga zona e pjekjes (për shembull furra), kur jeni duke gatuar. Mos harroni se soba, tenxheret që ziejnë dhe hekurat e hekurosjes, mbeten shumë të nxehtë për shumë kohë, edhe pasi kemi mbaruar punë me to.
– Në momentin që bëhet gjella, mbajini ushqimet dhe lëngjet e nxehta në qendër të tavolinës, në mënyrë që fëmija të mos ketë mundësi t’i kapë. Gjithashtu mbulesën e tavolinës duhet ta vendosni në atë mënyrë, që fëmija të mos ta tërheqë dhe t’i bien përsipër të gjitha ushqimet e nxehta.
– Mbani të gjitha thikat, pirunët, hapëset e tapave dhe aparatet e ndryshme grirëse, prerëse, rende etj, larg vendeve që mund t’i arrijë fëmija. Për të mos i penguar fëmijët në zbulimet e tyre, një ose dy sirtare mund t’ua lini ne dispozicion, duke i mbushur me sende që mund t’i marrin pa problem, ndërsa të gjithë sirtaret që kanë sende të rrezikshme për fëmijën, duhet të jenë të bllokuar me çelësa, që mos të hapen.
– Frigoriferi është një pajisje në kuzhinë, ku fëmija shumë lehtë mund të hapë derën dhe të pijë lëngje apo pije, jo të përshtatshme për moshën e tij. Edhe pjesa e ngrirjes e frigoriferit është mjaft e rrezikshme, sepse akulli shkakton djegie njësoj si zjarri.
– Bëni të mundur që fëmija të mos e prekë koshin e plehrave.
Kini kujdes:
– Vendosni ilaçin e enëve dhe të gjithë pastruesit e tjerë, në një vend të sigurt.
– Ruajini qeset larg vendeve që mund t’i kapë fëmija.
– Vendosini lëngjet e nxehta larg buzës së banakut të kuzhinës.
– Vendosni mbrojtëse përreth sobave të gatimit dhe rrotullojini dorezat e tiganëve, që të rrinë sa më larg buzës. Përdorni vatrat e pasme të sobës së gatimit, në vend të atyre të përparme.
– Blini kabllo në formë spirale për pajisjet elektrike ose sigurohuni që kabllot me të cilat ato janë të pajisura të jenë të shkurtra.
– Mbani të gjitha lëndët larëse të shtëpisë dhe koshin e plehrave në një dollap të sigurt, që fëmija të mos ta hapë dot.
– Mos e lejoni fëmijën të prekë xhamin e furrës, kur ajo është e ngrohtë.
– Mbuloni dyshemenë me tapet jorrëshkitës dhe pastroni menjëherë lëngjet apo yndyrnat që mund t’ju derdhen në dysheme.
Dhoma e gjumit
Fëmija juaj do të kalojë shumë kohë në dhomën e gjumit, kështu që bëni të mundur që ta eksplorojë atë pa rreziqe:
– Mos vini jastëk tek krevati I vogël, nëse fëmija juaj nuk ka mbushur ende dy vjeç dhe mos vendosni mbrojtëse plastike të pafiksuara tek dysheku.
– Mos përdorni kurrë lidhëse për të varur lodra në krevatin e fëmijës së vogël, sepse ato mund t’i përdridhen rreth qafës.
– Mbani lodrat me përmasa të mëdha dhe jastëket e mëdhenj jashtë krevatit, sepse fëmija mund t’i përdorë si shkallë apo varëse për t’u kacavjerrë dhe për t’u rrokullisur poshtë krevatit.
– Mos varni lodra nga një krah i krevatit në tjetrin, kur fëmija është në gjendje të qëndrojë në këmbë, sepse ai do të përkulet që t’i kapë dhe mund të rrëzohet.
– Lodrat duhet të jenë prej materiali johelmues dhe të padjegshëm dhe nuk duhet të kenë qoshe, buzë që presin, apo pjesëza të vogla që mund të gëlltiten.
– Vendosni ganxha tek dritaret, që të mos hapen plotësisht.
– Ruani lodrat në një dollap apo sirtar të ulët, që fëmija juaj t’i arrijë pa u kacavjerrë, apo pa hipur diku që mund të rrëzohet.
– Kur kaloriferët janë të ngrohtë, mbulojini ato me peshqir të lagur, që të mos thahet ajri.
– Sistemoni fundin e krevatit të fëmijës në pozicionin më të ulët (kur mund të lëvizet), para se fëmija të ketë mësuar që të qëndrojë në këmbë, sepse mund të varet nga krevati dhe të bjeri poshtë.
– Krevati i fëmijës duhet të qëndrojë larg ngrohësve. Mos e vendosni krevatin e fëmijës poshtë dritareve, sepse fëmijët kanë qejf të ngjiten kudo.
– Anët e krevatit të fëmijës duhet të jenë të ngritura, të paktën 60 cm.
– Dyshemeja duhet të jetë pa pengesa, rrugica, të ngritura. Tapetet dhe moketet nuk janë të këshillueshme, sepse është e vështirë të pastrohen cdo ditë. Kështu mund të grumbullohet pluhuri i shtëpisë, që ndikon tek fëmijët që kanë alergji.
Banja
– Mos e lini kurrë fëmijën tuaj vetëm në banjë, qoftë edhe për pak sekonda, derisa të mos ketë mbushur të paktën 2 vjeç e gjysmë.
– Përdorni një tapet të vogël banje, kundër rrëshqitjes.
– Mbyllni kapakët e WC-se.
– Të luajë me ujin, është një nga zbavitjet më të pëlqyera të fëmijës, por ka rrezik që duke hapur rubinetin e ujit të nxehtë, të digjet. Për të parandaluar këtë, rregulloni bolierin, në një temperaturë më të ulët se 50 gradë celcius.
– Kur i bëni banjë fëmijës tuaj, para se ta fusni në vaskë apo në dush, kontrolloni temperaturën e ujit.
Aksidentet e tjera që mund të ndodhin në banjë, mund të parandalohen lehtësisht, duke marrë disa masa paraprake:
– Vendosini veglat e rrojës apo mjetet kozmetike (buzëkuq, parfum ) atje ku fëmija nuk i kap dot.
– Mbuloni me peshqir ngrohësit.
– Mbajini lëndët larëse, detergjentët, lëngjet dhe furçën e pastrimit së WC-së në një dollap të mbyllur, që nuk hapet dot nga fëmija.
Dhoma e ndënjies
Në rast se keni fëmijë të vegjël, do të ishte më mirë që dhomën e ndenjes mos ta ngarkonit shumë me mobilje të rënda. Duhet të keni parasysh se një shtëpi nuk duket njësoj, nëse shikohet me sytë e një fëmije që fillon të ecë dhe vrapojë. Duke qenë se fëmija duhet të ketë mundësi të lëvizë lirisht, pa u rritur me frikën e rrezikut dhe pa u ndaluar, na takon ne ta kthejmë shtëpinë tonë në një shtëpi për fëmijë.
– Kur blini mobilje me tapiceri, sigurohuni që në dyqan se në rast se bie zjarr, ato nuk do të prodhojnë avuj helmues.
– Vendosni televizorin jashtë mundësive që ka fëmija për ta arritur, në mënyrë që të mos e kapi me dorë pjesën e pasme të tij.
– Mos lini cigare rreth e rrotull, fije shkrepëse, alkool, gjilpëra, gishtëza, kopsa, gërshërë të vogla dhe sende të tjera qepjeje apo monedha.
– Mbani larg fëmijës bimët/lulet e apartamentit, sepse disa prej tyre janë helmuese.
– Të gjitha sendet e vendosura mbi mobilje, që mund të jenë të thyeshme si abazhurë, tavlla, vazo, duhet të jenë aq larg, sa fëmija të mos i marri dot. Më e mira do të ishte të vinit sa më pak nga këto sende zbukurimi, sepse edhe kur ato janë larg fëmija prapë mund të vritet, për shembull mund të tërheqë kordonin elektrik të abazhurit dhe të dëmtohet.
– Hiqni çentrot, mbulesat mbi mobilje, sepse fëmija mund të kapet tek to dhe të rrëzohet.
– Në qoftë se dyert dhe dritaret kanë pjesë xhami, zëvendësojini me xhama të përforcuar sigurie, mbulojini me një cipë plastike transparente ose ngjisni mbi to disa ngjitëse me ngjyra, që fëmija t’i shohë dhe të mos të përplaset me xhamin.
– Mos mbani tavolina me suprinë prej xhami.
Ballkoni
Nëse dhoma e ndenjies apo kuzhina ka derë që të nxjerr në ballkon, duhet të shikoni mirë hapësirat midis kangjellave, lartësinë e parmakut dhe ta ngrini deri në një lartësi që fëmija të mos të përkulet dot, apo të hedhi sende nga ballkoni. Hiqni vazot e luleve nga parvazi, sepse fëmija mund të kapet tek ato.
Korridori dhe shkallët
– Siguroni dyert me çelës, para se fëmija juaj të mësoj të eci si mace (këmbadorazi), apo të ngjisi shkallët. Sigurohuni që korridori, shkallët dhe sheshpushimet e tyre, të jenë të ndriçuara mirë, si dhe që fëmija të mos mundë të fusi kokën, apo të kaloj midis shufrave të kangjellave.
– Mos lini lodra, grumbuj rrobash apo sende të tjera në shkallë, nëqoftëse keni shkallë brenda shtëpisë.
– Sigurohuni që dryni i portës kryesore (në rast se keni shtëpi me oborr) nuk mund të arrihet nga fëmija.
– Riparoni pjesët e tapeteve që mund të jenë shkëputur pjesërisht, shkepjet apo grisjet e tapeteve apo veshjeve të dyshemeve, nëqoftëse këto janë të llustruara (luçiduara), si dhe fiksoni nga ana e pasme e tapetit një bazë që pengon rrëshqitjen. Në dyshemetë e llustruara, mos e lejoni fëmijën që të eci me çorape që rrëshqasin. Nëqoftëse e lini të ecë këmbëzbathur, sigurohuni që të mos ketë ashkla që gërvishin këmbët.
Elektriciteti
Goditjet elektrike nga impiantet e ndryshme mund të jenë shumë të rënda, prandaj reduktojeni në minimum mundësinë që fëmija juaj të bëhet viktimë e këtij incidenti me ndihmën e këtyre porosive:
– Fikni pajisjet elektrike kur nuk i përdorni.
– Mos lini kurrë kordona zgjatues të përhapur nëpër shtëpi.
– Mbuloni prizat që nuk i përdorni me një kapak prize, ose me izolant.
– Kontrolloni rregullisht të gjitha kavot elektrike dhe zëvendësojini ato që janë me fije elektrike të veshura.
Rreziku i helmeve që keni në shtëpi
Kur një fëmijë sillet nëpër shtëpi gjithnjë duhet mbikqyrur. Mund të ndodhi që ai, i shtyrë nga kureshtja, të gëlltisi lëndë helmuese që ju i keni lënë në vende të pasigurta.
Si rregull i parë:
Asnjëherë mos u bllokoni nga paniku, sepse çdo minutë mund të jetë vendimtare për fëmijën.
Mos përdorni mjete që mendoni se janë të përshtatshme për situatën e krijuar, në rast se nuk ju ka këshilluar më parë një personel mjekësor, për shembull të
provokoni të vjella, apo (siç keni dëgjuar nga njerëz të tjerë) t’i jepni për të pirë qumësht. Kjo është e gabuar, sidomos për disa lëndë që janë avulluese si diluenti, benzina, vajguri, sepse provokimi i të vjellave dhe pirja e qumështit mund të shtojë edhe më shumë thithjen e tyre.
Rregullat e parandalimit
Duhet të kini parasysh disa rregulla parandalimi në lidhje me këto aksidente:
Të gjithë lëndët helmuese duhet të mbahen larg vendeve ku mund të arrihen nga fëmija, të mbyllura me çelësa.
– Enët që i mbajnë këto lëndë duhet të mbyllen fort dhe të kenë të shkruar emrin e lëndës, që t’i dalloni, veçanërisht plehrat kimike.
– Asnjëherë mos i lini shkrepset në vende që mund t’i gjejë fëmija, jo vetëm për rrezikun e zjarrit, por edhe sepse lënda që ndodhet në kokën e shkrepseve është helmuese.
– Jo të gjitha produktet helmuese që fëmija mund të preki, kanë të njëjtën shkallë helmimi.
Duke i ndarë këta produkte sipas shkallës së rrezikshmërisë së tyre, mund të kemi tre lista.
Në lidhje me bimët, më të rrezikshme janë kërpudhat, farat e oleandrit, që kanë lëndë të tilla që mund të dëmtojnë rrugët e frymëmarrjes, rrushku, dëllënja, që ka kokrra shumë helmuese që mund të shkaktojnë probleme të zemrës.
Duke folur për ilaçet që janë helmuese, më të rrezikshme janë antidiabetikët dhe ato kundër astmës (dhe në këtë rast ato që kanë teofilinë), si dhe të gjithë ngacmuesit e sistemit nervor.

Lexo edhe: Siguria e lodrave te femijes


Për të lënë një koment ju duhet të jeni regjistruar Identifikohu



Materiale te ngjashme

Kërcënime dhe premtime boshe që...

Kërcënimet ose premtimet boshe janë një mjet gati i pashmangshëm i prindërve. Nuk është një mjet i mirë - shumica e prindërve e kuptojnë këtë - por ndonjëherë është i...

Sa të sigurta jemi se...

Edukimi është një nga themelet më të forta që mund të hedhë një prind, që përpara se të vijë në jetë fëmija, që në çastin kur mësojnë se po ngjizet...

Pse prindërit kanë më shumë...

Është e kotë të pyesësh një nënë nëse debaton ndonjëherë me fëmijët e saj. Madje, pyetja më e drejtë do të ishte se me cilin prej fëmijëve debatoni më shumë....

10 rregullat e etikës  për...

Njohja me këto rregulla edhe pse jo moderne do t'ju ndihmojë të lini një përshtypje të mirë pavarësisht se ku jeni. Bright Side ka studiuar disa rregulla etike, që mund...

Ne kemi reklame ju lutem caktivizoni adblock ne menyre qe te navigoni lehtesisht.
Faleminderit!

A keni një llogari? Identifikohu


Regjistrohu


[nextend_social_login login="1" link="1" unlink="1" ] X

Ndrysho fjalkalimin


X